Štorija o črnim besedami:

2003. leta, tamo na plaže va Medveje,Aywar Groszgrock i ja smo kjeli i kantali po domaćen, na čakavsken, kot pravi death metalci. Smeli smo se kako nemi i rekli : 'ča kurac, homo storit bend ki će bit jušto takov!' Pa smo malo misleli ki bi mogal sost? Ja, Č.R.U. (Črno Rešetarsko urlikalo), ću vapit, a ti Ayware sopi gitaru na letriku. I oni dva z Hesus Attora će nan se prikopčat, pa će Digitus švikat po bubnji, a Abnormal Reactor će se ćapat basa.
Armageljona Espaljona z OPPa smo isto zvali da zasope drugu gitaru, aš je on i zmislel onput ime Po' Metra Crijeva. Vaje smo se si složili da tisto ime rabi zet za ovi hudi maškarani metal dišpet.
Zajedno smo drugi dan storili Mačići i Va Oštarije. Jebenti, kakov kapuz je to bil! Va mesec dan smo imeli šest kancon parićaneh za snimit.
Tu jesen smo šli va studio"Usurduktor",pul Jabeta i otamo nan je E.P.,"Črne besede va Kastafskeh šumah". Fanj se j' žvelto naša beseda čula med juden, pa su vaje Opatijci, Kastafci i Rečani jušto znali ki su ti šegavci.

Na Ri-Rocke 2003., smo zasopli prvi put i već onput smo imeli i maskote,pače, judi ki su bili parićani delat totalne barufe s nami na koncerteh.
Hrvoje Fiamengo - Hrušt je bil tu va uloge Ugluka, a kašneje i Vjevera. Jabe, kot producent i protagonist Kvarnerske underground scene, je igral Usurduktora-metal pederčinu a,neš kašneje,Hrvoje Silić, naš ilustrator, Franeta Iznutricosjeka. On još vavek s nami dela monadi kada sopemo. On nan je dal i ilustracije za ovo izdanje, Vjevera i Mucifera.
Kristijan Vučković je bil i ostal naš fotograf, a snimil je i video tega prvega koncerta.
Naš veli srdočanski muzikolog, Goran Mikulić Cvik, ni bil ni fotograf ni ilustrator ni maskota, ma se j' on spametil definirat da j' to ča sopemo - Ča Metal! E, jušto tako!

Nakon petnajst let od stareh monstrumi smo ostali Armageljon Espaljon i ja. Prišli su neki novi vrazi sost s nami. Šaman Šamanić na sopelah i klavijaturah, Ogan Keksburg z Školjki na base i Tomo Niprija z OPPa na bubnjeh.
Va toj novoj postave smo rešili da ni lazno pa smo reizdali E.P., aš ga nigder više ni bilo za daunlodirat, pa onput ni za naslišat. Stari CeDeji su se zlizali i ki zna ča j' š njimi.
Pokojni Marijan Marić z Školjki, kad je čul E.P. pret toliko let, narisal je sliku "Kastav Gori" ku morete i videt va oven novem izdanju.
Na oven CeDee je original snimka ku j' arhiviral Damir Tomić - Jabe, a da nan ne zmerate kako smo škrti, smo van snimili i par bonusi za naslišat.
Tu su "Lipica" i "Kastav Gori" va noven aranžmanei "Dida" od benda Školjke, času nan bili vela inspiracija i dragi kumpanji.
Dr. Tracksmash Pablo i Armageljon Espaljon su oteli da Jure Grando gre iskat krf na Jamajku, pa su njemu kako na čast zmiksali regge verziju, a pomogle su njin Ana Balkana, z OPP, i Sanja Minić tako ča su kantale nekakove monadi.
E.P. je onputbil izdan za našu miću d.i.y. kuću "Izdali Smo Metal", a tako j' i sad. Logo ISM je storil Franjo Butorac - Frenki.

Ča reć? Petnajst let je pasalo od prveh snimki i početka najšegavejega maškaranega metal benda va Kastve i šire. Morda i va Halubje. Kat se spametin kolikemi se j' juden ova bedastoća pijažala, ne samo metalcon, nego semi onemi ki su onda prihajali na koncerti poslušat Čriva. A zač? Ki to zna! Morda aš smo prvi va regije zalepili humor i Istrijanštinu/čakavicu z metalon; morda radi našeh svirki ke su bile urnebesne? Morda su krive maske. Morda zato aš je prišlo vreme za takovo nešstorit. Ki će ga znat?
Na kraje oveh besed, semu zborujedno ogromno i velo hvala! Ovo reizdanje je za seh vas ki ste storili celu štoriju oko Čriva, pogotovo staremi člani benda. Semi onemi ki su nas onput pohodili i ki nas i sad pohode. "Črne besede va Kastafskeh šumah" va noven ruhe su tu za seh vas.
Č.R.U. i Po' Metra Crijeva